Basauriko Udalak bi milioi euro inguruko kreditu-aldaketak onartu ditu. Kopuru horren zatirik handiena, 1,8 milioi, San Fausto, Bidebieta eta Pozokoetxe auzoetan martxan dagoen makroproiektua indartzeko erabiliko da, eta datorren hamarkadan 20 milioi euro baino gehiago inbertituko dira. Udalak Pozokoetxeko lursailen salmentaren truke  aipatutako diru-kopurua jaso ahal izan du.

 Aurrekontu horrek hainbat jarduera ordaintzeko balioko du, besteak beste, Agirre Lehendakariaren 31. ataria eraistea, urtea amaitu baino lehen burutuko dena. Gogoratu behar da dagoeneko eraitsi dituztela Arizgoiti plazako 3,4 eta 5 zenbakiak, Agirre Lehendakariaren kaleko 27 eta 29 atariak eta San Fausto kaleko 4 eta 6 eraikinak. Gainera, onartutako aurrekontuan Pozokoetxeko bide berria eraikitzea eta desjabetzeen kasuan, konpentsazio ekonomikoen ordainketak ere sartuko dira. Bide horretan, birkokatzearen ordez, konpentsazio ekonomikoaren aukera hartu dute Juan Ibargutxi kaleko 2. atariko zazpi familiek. Aipatutako etxebizitza datorren urteko lehen seihilekoan eraitsiko dute.